تاند (شنبه، د مرغومي/ جدي ۲۹ مه) د ملګرو ملتونو د کډوالو د لویې کمېشنرۍ (UNHCR) او د اروپایي اتحادیې (EU) ترمنځ د یوې تازه موافقې پر اساس به اروپايي اتحادیه په ۳۶ میلیون یورو مرستې په افغانستان کې دننه بېځایه شویو افغانانو او په افغانستان، ایران، پاکستان او د منځنۍ آسیا په هېوادونو کې د دوی د کوربنو ټولنو ملاتړ وکړي.
په دې اړه د اروپایي اتحادیې په خبرپاڼه کې راغلي دي د دې اتحادیې په دې پیسو سلګونه زره افغان کډوال، راستنېدونکي او کورني بېځایه شوي کسان له اساسي خوندیتوب، د ژوند معیشت فرصتونو او نورو لومړنیو خدماتو څخه برخمنېږي.
د افغانستان لپاره د اروپایي اتحادیې د پلاوي سرپرستې، ورونيکا بوسکوویچ پوهار وویل:
«اروپایي اتحادیه به د افغانانو ملاتړ ته دوام ورکړي. د کډوالو د لویې کمیشنرۍ لپاره دا نوې مرسته د کډوالۍ په برخه کې زموږ د لویو هڅو یوه برخه ده چې بېځایه شویو ښځو، نارینهوو او ماشومانو ته د فرصتونو او اړینو خدماتو ملاتړ برابروي. زموږ مرسته به د افرادو او پراخو ټولنو د ژوند د شرایطو په ښه کولو کې مرسته وکړي.»
په افغانستان کې د UNHCR استازي، عرفات جمال وویل: «له اروپایي اتحادیې سره دا اوږدمهاله همکاري زموږ د هغو هڅو لپاره یو مهم پرمختګ دی چې په کوربنو هېوادونو کې د راستنېدونکو او کډوالو ملاتړ کوو. د دې نوښتونو هدف یوازې د ژوند ژغورونکي مرستې چمتو کول نه دي، بلکې د بېځایه شویو خلکو لپاره هغه وسایل برابرول دي چې خپل ژوند بیا جوړ کړي او خپلو ټولنو ته وده ورکړي.»
دا درې کلن پروګرام به د ۲۰۲۵ کال د جنورۍ په میاشت کې پیل او د ۲۰۲۷ تر دسمبر پورې دوام وکړي.