تاند (دوشنبه، د مرغومي/ جدي ۲۴ مه) د افغانستان پخواني ولسمشر حامد کرزي د دوشنبې په ورځ په یوه بیان کې یو ځل بیا له طالبانو وغوښتل چې ژر تر ژره د نجونو لپاره ښوونځي او پوهنتونونه بیا پرانیزي.
سره له دې چې د طالبانو مشر او شاوخوا کړۍ یې د نجونو د ښوونځیو په اړه خبرې نه خوښوي، حامد کرزی، چې په کابل کې اوسي هر څه موده وروسته په دې ډلې غږ کوي چې نجونو ته د زده کړو حق ورکړي.
ښاغلي کرزي د اسلاماباد په غونډه کې د اسلامي نړۍ د اتحادیې (مسلم ورلډ لیګ) د کنفرانس د اعلامیې هم هرکلی وکړ، چې په اسلامي نړۍ کې د نجونو د زدهکړو د خنډونو د لرې کولو اهمیت یې په ګوته کړی دی. هغه له طالبانو وغوښتل چې دې اصولو ته پام وکړي او ژر اقدام وکړي څو د افغانستان راتلونکي ته بیا هیلې وغوړېږي.
کرزي ټینګار وکړ چې د نجونو زدهکړو مخنیوی نه یوازې د توجیه وړ نه دی، بلکې د افغانستان ملي ګټو ته زیان رسوي.
ده وویل: «زدهکړه د افغان نجونو لپاره یو بېپوښتنې او نه حتمي حق دی. ښوونځي ته د دوی د تګ مخنیوی زموږ د هېواد له ملي ګټو او لوړو هدفونو سره په ټکر کې دی.»
کرزي د دې پالیسۍ د اغېزو په اړه خپله اندېښنه څرګنده کړه، ویې ویل چې د ښوونیزو بنسټونو بیا پرانیستل د هېواد د ځوانانو د ځواکمنتیا، د ځان بسیاینې او د هغو افغانانو چې بهر ته د فرصتونو په لټه کې دي، د کډواله کېدو د کمولو لپاره ډېر مهم دي.
پخواني ولسمشر زیاته کړه: «د نجونو د زدهکړو په مخنیوي موږ د ټولنې ثبات، د کورنیو ځواکمنتیا، او د هېواد پرمختګ زیانمنوو.»
طالبانو نجونې او ښځې له منځنیو ښوونځیو او پوهنتونونو څخه منع کړي دي. ښځې همداراز د طبي زدهکړو او په غیر دولتي سازمانونو کې له کار کولو څخه هم منع شوې دي.
طالب مشرانو د نجونو د زده کړو د مخنیوي لپاره هیڅ راز دیني او شرعي توجیه نه وړاندې کوي.