تاند (شنبه، د مرغومي / جدي ۲۲ مه) په داسي حال کې چې له افغانستان سره د پاکستان دښمني په زیاتېدو ده، او حتي د قانوني افغان کډوالو ځورولو او نیونو ته دوام ورکوي، دغه هیواد افغان محصلانو ته څلور نیم زره سکالرشیپونه اعلان کړل.
په وروستیو دوو ورځو کې پاکستاني پوځیانو د کونړ ولایت پر سرکاڼو او دانګام ولسوالیو د توپونو او نورو درنو وسلو لسګونې مرمۍ ویشتي دي.
د پاکستان پوځ ته نژدې رسنۍ سما پرون (جمعه) د افغانستان لپاره د پاکستان د ځانګړي استازي محمد صادق له قوله وویل چې پاکستان به افغان محصلانو ته ۴۵۰۰ بشپړ سکالرشیپونه ورکړي، چې د ده په وینا دا د سیمې پرمختګ او همغږۍ ته د پاکستان ژمنتیا ښیي.
هغه دغه راز ویلي چې دا سخاوتمندانه اقدام دا باور ثابتوي چې پاکستان د افرادو او ټولنو د پرمختګ ځواک لري. د طب، انجینرۍ، کرنې او لوړو زدهکړو په څېر برخو کې د فرصتونو په وړاندې کولو سره، پاکستان هڅه کوي افغان ځوانانو ته اړینې وړتیاوې ورکړي څو د خپل هېواد په بیا جوړونه او پرمختګ کې مرسته وکړي.
محمد صادق خان دا هم ویلي چې د لیسانس، ماسټرۍ او دوکتورا د پروګرامونو لپاره د بورسونو برابرول د پاکستان د هغه اوږدمهاله نظر ښکارندويي کوي چې غواړي د علمي او مسلکي معیارونو پیاوړتیا ته وده ورکړي.
د محمد صادق خان په وینا، پاکستان د دغو سکالرشیپونو د ورکولو د بهیر شفافیت یقیني کړی دی.
پاکستان پخوا د هند له لوري افغان محصلانو ته د سکالرشیپونو پر ورکولو اعتراض درلود او ویل یې چې افغانان دې د پوځي زده کړو لپاره پاکستان ته واستول شي.