تاند ( دوشنبه د مرغومي ـ جدي ۱۷مه) د طالبانو حکومت د لوړو زده کړو وزارت وایي، د ادبي غلا مخنیوي او معیاري څېړنو لپاره یې د هېواد پوهنتونونو لپاره Turnitinاو ګرامرلي سافټویرونه پېرلي دي.
یاد وزارت زیاته کړې، چې د دغو سافټویرونو تر فعالېدو وروسته به د لیسانس، ماسټرۍ او دوکتورا دورې زده کړیالانو او د استادانو د ترفېعي آثارو د ادبي غلا یا پلېجریزم مخنیوی وشي.
د طالبانو لوړو زده کړو وزارت همداراز ویلي، چې د تحصیلي بنسټونو ژورنالونو او استادانو د عملي مقالو د معیاري کولو په موخه ګرامرلي سافټویر اکاونټ هم پېرلی دی.
د یادونې ده، چې طالبانو تر دې وړاندې هم افغانستان کې د تحصیلي نصاب د معیاري کولو لپاره د هېواد تحصلي بنسټونو کې علمي او تحقیقي معاونیت رامنځته کړی دی.
د نظر خاوندان دا یو ښه اقدام بولي او د فعالیت پر ژر پیل یې ټینګار کوي.
دوی وایي په دې سره به د ادبي غلا د مخنیوي ترڅنګ ملي ژبو کې له کیفیته ډک اثار هم رامنځته شي.