تاند (یکشنبه، د مرغومي/ جدي ۱۶ مه) د بلوچستان د ازادۍ پوځ (BLA) ادعا کوي چې پرون یې د بلوچستان په تُربت کې د پاکستان د پوځ ۴۷ سرتېري وژلي دي.
پرون وروسته له دې چې د بلوچستان د ازادۍ پوځ وسله والې ډلې وویل چې په تربت کې یې د پاکستان د پوځ پر کاروان په برید کې دغه پوځ ته درنه مرګ ژوبله اړولې، پاکستاني چارواکو خپلو پوځیانو ته مرګ ژوبله تایید کړه خو شمېر یې کم وښود.
د بلوچستان د ازادۍ پوځ نن په یوه خبرپاڼه کې ویلي چې مجید لوا یې له تربت ښاره ۸ کیلومتره لیري د پوځ پر کاروان په فدايي برید کې د ۴۷ پوځیانو د وژلو ترڅنګ ۳۰ نور ټپیان کړي او ګڼ نقلیه وسایط یې ویجاړ کړي دي.
دې ډلې د خپل فدايي حمله کوونکي عکس، نوم او د بلوچستان د ازادۍ پوځ سره د هغه د یوځای کېدو نېټه هم په خپله خبرپاڼه کې اعلان کړي دي.