تاند (جمعه، د مرغومي/ جدي 14 مه) د امریکا د منتخب ولسمشر ډونال ټرمپ د راتلونکي حکومت د ملي امنیت سلاکار وایي چې د امریکا د راتلونکي حکومت ستراتیژي به د داعش او القاعده په څېر ډلو پر کنټرول تمرکز ولري.
مایک والټز وویل چې د دې پلان پر اساس په افغانستان، عراق او سوریه کې اقدامات شامل دي، هغه ځایونه چې کېدای شي ورڅخه د امریکا پر ضد بریدونه پلان شي.
والټز نن (د جمعې ورځ، د مرغومي ۱۴مه،) په یوه مرکه کې له فاکس نیوز سره په خبرو کې وویل چې امریکا باید د خپلې دفاع په اړه جدي فکر وکړي او تر ټولو لومړی باید خپلې پولې ټینګې کړي.
د امریکا د راتلونکي حکومت د ملي امنیت سلاکار په دې مرکه کې همداراز وویل چې په تېرو کلونو کې له ۳۰۰ څخه زیات هغه کسان چې د څارل کېدونکو ترهګرو په لیست کې شامل دي، له پولو امریکا ته وراوښتي دي.
هغه وویل: « تېر کال د داعش اته غړي، چې په درې بېلابېلو ښارونو کې یې د بریدونو پلان درلود، وپېژندل او ونیول شول. سره له دې، د دې ډلې ځینې غړي چې مرکز یې په تاجکستان کې دی، لا هم نه دي پېژندل شوي.»
مایک والټز همداراز د تروریستي ډلو د ګواښونو په وړاندې د استخباراتي همکارۍ او د قانون د پلي کولو پر اهمیت ټینګار وکړ او زیاته یې کړه: «د دې ترڅنګ، تهاجمي اړخ هم باید وڅېړل شي. په دې کې د بهرنیو ستراتیژیو ارزونه، د اډو موقعیت او د ځانګړو ځواکونو ځای پرځای کول شامل دي، ترڅو د داعش او القاعده په څېر ډلو فعالیتونه په افغانستان، عراق، سوریه او نورو سیمو کې ودرول شي.»
د هغه په وینا، دا اقدامات د امریکا د امنیت لپاره ضروري دي او واشنګټن ته اجازه ورکوي چې د جهادي ډلو د احتمالي بریدونو او پلانونو مخنیوی وکړي.
والټز په زغرده ونه ویل چې د امریکا نوی حکومت، چې د روانې جنورۍ په شلمه واک ترلاسه کوي، په افغانستان، عراق او سوریه کې به په څه ډول د ده په وینا د تروریستي ګواښونو مخه نیسي.
په سوریه کې د بشار اسد د حکومت له پرزېدو او په دغه هیواد کې د ایران او روسیې د نفوذ له پای ته رسیدو سره امریکا او اسراییل ته په دغه عربي هیواد کې د هر ډول مداخلې لاره هواره شوې ده. د ایران د کمزوره کېدو له کبله د عراق وضعیت هم مخ په بدلېدو دی او په افغانستان کې د طالبانو افراطي اقداماتو داسي شرایط برابر کړي چې که امریکا بیا وغواړي افغانستان ته ځواکونه واستوي یا د خپلو نیابتي ځواکونه ملاتړ وکړي، د ۲۰۰۱ م کال د پای په شان به د ډېرو افغانانو له هرکلي سره مخامخ شي.