تاند (جمعه، د مرغومي/ جدي ۱۳ مه) له خوست ولایت څخه ترلاسه شوي راپورونه ښيي چې تيره شپه د دغه ولایت د تریزیو او علي شیرو ولسوالۍ د ډبکي په سیمه کې د پاکستاني او افغان ځواکونو ترمنځ جګړه شوې ده.
ځايي اوسیدونکو تایید کړه چې جګړه د شپې په یوه نیمه بجه پیل شوه او د سهار تر ۶ بجو يې دوام وکړ.
ویل شوي چې دواړو خواوو د یو بل پر پوستو او پوځي مرکزونو ډزې کړي او له همدې کبله ملکیانو ته زیان نه دی اوښتی.
طالب سرچینې وايي چې د دوی خواکونو ته هم زیان نه دی اوښتی.
د خوست په ډبکي کې تر دې وړاندې هم د افغان او پاکستاني ځواکونو ترمنځ نښته شوې وه. تېره نښته وروسته له دې وشوه چې پاکستان د پکتیکا په برمل ولسوالي کې بمباري وکړه او ۵۱ ملکیان یې ووژل.
طالبانو پر برمل د پاکستان د هوايي برید په بدل کې په خوست او پکتیا ولایتونو کې ډیورند کرښې ته نژدې د پاکستاني ځواکونو پوستې وویشتې.
پاکستان وویل چې د طالبانو د ځوابي برید له کبله یې یو شمېر ځواکونو ته مرګ ژوبله واوښته.