تاند ( یکشنبه د مرغومي ـ جدي ۹مه) د روسیې د بهرنیو چارو وزارت له افغان او پاکستاني لوري غوښتي،چې له زغمه کار واخلي او ستونزې د خبرو له لارې حل کړي.
د روسیې د بهرنیو چارو وزارت ویاندې ماریا زخارووا ویلي، مسکو د ډیورنډ فرضي کرښې اوږدو کې د دواړو هېوادونو ترمنځ زیاتېدونکي کړکېچ ته اندېښنه لري.
مسکو وروسته له هغې دغه اندېښنه ښودلې، چې تېره ورځ شنبه طالب ځواکونو د ډیورڼد فرضي کرښې پاکستاني لور ته هغه ځایونه په نښه کړل چې د طالب چارواکو په وینا پر افغانستان ترې بریدونه پلانېدل.
د طالب ځواکونو له لوري دغه انتقامي بریدونه یوه ورځ وروسته له هغې وشول، چې د پاکستان هوایي ځواک د پکتیکا برمل ولسوالۍ کې پر ملکي وګړو بمباري وکړه او ۴۶تنه ملکیان یې ووژل او ۶تنه نور یې ټپیان کړل.