تاند ( یکشنبه د مرغومي ـ جدي ۹مه) د افغانستان د کرکټ ملي لوبډلې او زمبابوې ترمنځ د روانې ټېسټ لوبې نن څلورمه ورځ ده.
پرون د روانې ټېسټ لوبې په درېیمه ورځ افغان لوبغاړو غوره توپوهنه وکړه.
د لوبې په لومړي پاڼۍ کې زمبابوې افغان لوبډلې ته د ۵۸۶ منډو هدف مخې ته کېښوده.
افغان لوبډلې د خپلو دوه لوبغاړو په زیان خپلې منډې ۴۲۵ ته ورسولې.
د افغان لوبډلې په ګټه رحمت شاه زرمتي ۲۳۱* او لوبډلمشر حشمت الله شهیدي ۱۴۱* منډې جوړې کړې دي.
افغان لوبډله اوسمهال د سیالې لوبډلې د لومړۍ پاڼۍ له ۵۸۶ منډو ۱۶۱ منډې شاته ده او نن سهار به له همدې ځایه خپله توپوهنه پیل کړي.
د زمبابوې پر وړاندې روانه ټېسټ لوبه کې د رحمت شاه زرمتي او حشمت الله شهیدي ترمنځ د ۳۶۱* منډو ملګرتیا د افغان لوبغاړو ترمنځ په ټېسټ کرکټ سیالیو کې ترټولو لوړه ملګرتیا وشمېرل شوه.