تاند ( شنبه د مرغومي ـ جدي ۸مه) د طالبانو د حکومت دفاع وزارت وایي، د ډېورنډ فرضي کرښې هاغاړې پاکستاني لوري ته یې غچ اخیستونکي بریدونه کړي دي.
یاد وزارت وایي دوی په دې بریدونو کې د ” شریرو عناصرو او د دوی د ملاتړو” پټنځایونه چې افغانستان کې ترې بریدونه تنظیمېدل، په نښه کړي دي.
د طالبانو دفاع وزارت لیکلي: « د هیواد د سویل ختيځ له استقامته د فرضي کرښې ها غاړې ته په څو ځایونو کې د هغو شریرو عناصرو او د دوی د ملاتړو پټنځايونه او مرکزونه انتقاماً تر بریدونو لاندې ونيول شول، له کومو څخه چې، په افغانستان کې بریدونو تنظمېدل.”
د یادونې ده چې تېره شپه د طالبانو او پاکستانیو ځواکونو ترمنځ نښته هم شوې، چې د پاکستاني پوله ساتو په برید کې د پکتیا پنځه اوسېدونکي وژل شوي دي.
د افغان او پاکستاني پوله ساتو ترمنځ نښته کې د پکتیا په ډنډ پټان ولسوالۍ کې د پاکستاني له لوري هاوان مرمیو کې د دغې ولسوالۍ پنځه اوسېدونکي وژل شوي او درې نور ټپیان دي.
د طالبانو دفاع وزارت کې سرچینو رسنیو ته تر دې وړاندې منلې وه، چې دغه جګړه کې یې ۱۹ پاکستاني پوځیان وژلي دي.
د پاکستان او افغانستان ترمنځ اړیکې تر بل هر وخت داسې مهال ترینګلې شوي، چې څور ورځې وړاندې پاکستاني الوتکو پکتیکا کې پر ولسي خلکو هوایي بمباري وکړه.