تاند(جمعه، د لیندۍ/ قوس ۱۶ مه) د افغانستان او پاکستان د سوداګرۍ ګډې خونې اعلان وکړ چې د افغانستان او پاکستان ترمنځ د سوداګرۍ کچه له دوه نیم میلیارده ډالرو څخه ۷۰۰ میلیون ډالرو ته راټیټه شوې ده.
دې ادارې اسلاماباد له افغانستان سره د سوداګریزو اړیکو د کمېدو مسوول بللی دی.
د نیوز ورځپاڼې د راپور له مخې، د دې خونې مرستیال ضیاالحق سرحدي د چهارشنبې په ورځ، د لیندۍ ۱۴مه، په یوه بیان کې بیلابیل عوامل د دې کمښت د اصلي لاملونو په توګه وړاندې کړل.
هغه وویل چې د پاکستان حکومت د بندیزونو لکه د لنډمهاله منل شوي سند شرط، د توکو د ارزښت په اندازه د بانکي تضمین غوښتنه، په منفي لیست کې د ۱۴ قلنه جنسونو اضافه کول، د افغانستان د ترانزیتي توکو لپاره د ۱۰ سلنه ګمرکي محصول تطبیق، او په کراچۍ بندر کې د افغان سوداګرو تر ۳۰۰ د زیاتو کانټینرونو درول د دواړو هېوادونو ترمنځ د سوداګرې اړیکو د کمیدو سببونه بللي دي.
سرحدي زیاته کړه چې دا تګلاره د دې سبب شوې چې د افغانستان یوه لویه برخه سوداګري د کراچۍ بندر پر ځای د ایران چابهار بندر ته انتقال شي، چې په نتیجه کې یې په پاکستان کې زرګونه کسان د ګمرک په برخه کې بېروزګاره شوي دي.
هغه همداراز د خیبرپښتونخوا ایالت هغه پرېکړه چې د تورخم له لارې افغانستان ته په صادرېدونکو توکو باندې یې ۲ سلنه اضافه تعرفه وضع کړې، وغندله. دې تعرفې، چې د ایالتي زیربناوو د پرمختګ په موخه اعلان شوې، په سوداګرو زیات فشار راوړی دی.
د افغانستان او پاکستان د سوداګرۍ ګډې خونې پر دې تګلارو د سمدستي بیاکتنې غوښتنه کړې ترڅو د دواړو هېوادونو ترمنځ سوداګرۍ او اقتصادي همکارۍ ته نور زیان ونهرسېږي.
پر یادو ستونزو سربېره پاکستان په ځلونو هغه مهال چې د افغانستان د میوو د صادرېدو وخت وي، خپلې لارې په یوه او بله پلمه بندې کړي او په دې توګه یې افغان سوداګرو ته سخت زیان اړولی دی.