تاند (سې شنبه، د لیندۍ/ قوس ۱۳ مه) د جرمونو نړیوالې محکمې ته په افغانستان کې له ښځو سره د طالبانو د بې رحمانه چلند د دوسیې له سپارلو وروسته، د دې محکمې څارنوال کریم خان اعلان وکړ چې ډېر ژر به د طالب چارواکو د نیولو حکمونه صادر کړي.

هغه وویل چې د طالبانو له لوري د بشري حقونو، په ځانګړي توګه د ښځو د حقونو د نقض په اړه پلټنې دوام لري.

د جرمونو د نړیوالې محکمې د غړو هېوادونو درویشتمه ناسته پرون (سې شنبې) د هالند په هاګ ښار کې پیل شوه. دغه ناسته د دسمبر له ۲مې څخه تر ۷مې پورې پلان شوې ده.

کریم خان د دوشنبې په ورځ په دې ناسته کې په یوه اعلامیه کې وویل:
“زه تاییدولی شم چې د هغه عالي ټیم د پرله‌پسې هڅو په پایله کې چې په دې موضوع یې کار کاوه، موږ به ډېر ژر د افغانستان د وضعیت په اړه دوسیه کې د توقیف د حکم غوښتنه وکړو.”

هغه د دې حکم په اړه نور جزئیات ورنه کړل.

د دې حکم د صادرېدو په صورت کې به د طالبانو هغه چارواکي، چې د ښځو خلاف په فرمانونو او حکمونو کې دخیل دي، نور هغو هیوادونو ته سفر نه شي کولی چې د جرمونو د نړیوالې محکمې غړیتوب لري.

تېره اوونۍ د چیلي، کاستاریکا، هسپانیا، فرانسې، لوګزامبورګ، او مکسیکو هېوادونو په ځانګړي ډول د افغان ښځو د حقونو د نقض موضوع نړیوالې جزايي محکمې ته وسپارله. د جرمونو نړیوالې محکمې هم تایید کړه چې دا دوسیه ورته رسېدلې ده.

یادې محکمې په دې وروستیو کې د اسراییل د صدراعظم بنیامین نتانیاهو، د پخواني دفاع وزیر یوآو ګالانت، د روسیې د ولسمشر ولادیمیر پوتین او د میانمار د دیکتاتور د نیولو حکم صادر کړی دی.

اټکل کېږي چې دا محکمه د طالبانو د ځینو مشرانو د نیولو حکم هم صادر کړي، چې په افغانستان کې د ښځو پر وړاندې په “سیسټماټیک تاوتریخوالي” او “جنسیتي اپارتاید” کې ښکېل ګڼل شوي دي.

د چارو ځینې کتونکي د دې محکمې پرېکړه له دې کبله اغېزمنه نه ګڼي چې محکمه به ښايي یوازې د هغو طالب مشرانو د نیولو حکم صادر کړي چې د ښځو خلاف په بندیزونو او سرغړونو کې لاس لري. په دې برخه کې ټولې پرېکړې د طالبانو مشر او شاوخوا یې څو ملایان کوي چې هسي هم نه بهر ته ځي او نه هم ځانونه خلکو ته ښيي.