تاند (پنجشنبه، د لیندۍ/ قوس ۸ مه) د جرمني د کورنیو چارو وزارت د چارشنبې په ورځ، د نومبر ۲۷ (د لیندۍ ۷)، اعلان وکړ چې دغه هېواد د عامه او خصوصي ودانیو یو لېست جوړوي چې د اړتیا صورت کې به د جګړې پر پناهځایونو بدل شي.
په دې لېست کې ځینې پارکینګونه، د میټرو تمځي، حکومتي ودانۍ، او خصوصي ملکیتونه شامل دي. همداراز، د یو موبایل اپلیکیشن جوړولو پلان هم شته چې د دې پناهځایونو ډیجیټل فهرست ولري همداراز به دخلک وهڅول شي چې خپلې تلخونې او ګاراجونه په پناهځایونو بدل کړي.
د دې پلان په اړه لومړی بیلد ورځپاڼې د دوشنبې په ورځ راپور ورکړی و، چې دا یې د نړیوالو ګواښونو، په ځانګړې توګه د روسیې له خوا د زیاتېدونکو تهدیدونو پر وړاندې یو اقدام بللی و. د کورنیو چارو وزارت ویاند پرته له دې چې د امنیتي حالت خرابوالي ته اشاره وکړي، دا پروژه لویه وبلله او ویې ویل چې وخت او د ګڼو ادارو ترمنځ همغږۍ ته اړتیا لري.
په جرمني کې د مدني خوندیتوب سازمانونو د هېواد په کچه د بمونو په وړاندې د پناهځایونو د پراختیا غوښتنه کړې ده. اوسمهال جرمني ۵۷۹ پناهځایونه لري، چې ډېری یې د دوهمې نړیوالې جګړې له وخته پاتې دي.
د رسنیو د راپورونو له مخې، دا پلان د جون په میاشت کې منل شوی و او د یوې ځانګړې کمېټې له خوا ارزول کېږي.
د جرمني کورنۍ دفاع
د ۲۰۲۲ کال د فبرورۍ په میاشت کې پر اوکراین د روسیې له برید وروسته، جرمني د داخلي دفاع برخې ته زیات پام اړولی دی. د جرمني صدراعظم، اولاف شولڅ، د روسیې له یرغل وروسته ژمنه وکړه چې د هېواد نظامي ځواکونه به یې په ډېره پانګونه د وسلو جوړولو پروژې پیاوړي کړي.
سره له دې، د دې هېواد د پوځ بودیجه لا هم محدوده پاتې ده.
تېره اوونۍ د سویډن حکومت په یوه کتابچه کې، چې د دوشنبې له ورځې (د نوومبر ۱۸) څخه یې خپلو ۵.۲ میلیون اتباعو ته وېش پیل کړ، هغوی هڅوي چې د دې احتمالي وضعیت لپاره ځانونه چمتو کړي.
په ورته وخت کې، د فنلنډ حکومت یوه ویبپاڼه پرانیستې چې د خپلو اتباعو لپاره ورته امنیتي سپارښتنې وړاندې کوي څو د روسیې د احتمالي برید پر مهال تیار اوسي.