تاند (پنجشنبه، د لیندۍ/ قوس ۸ مه) د روسیې د استخباراتو یا امنیتي خدماتو (F.S.B) ادارې رئیس وايي چې په افغانستان کې د نړیوالو تروریستي ډلو شتون د منځنۍ آسیا هیوادونو ته تر ټولو لوی خطر دی.

الکساندر بورتنیکوف د داعش خراسان څانګې او القاعدې یادونه وکړه او د طالبانو سره د همکارۍ پر اهمیت ټینګار وکړ ترڅو له دې ګواښونو سره مبارزه وشي.

د روسیې دولتي تاس خبري اژانس “تاس” وايي چې د دغه هیواد د امنیتي خدماتو رئیس د ګډو ګټو د خپلواکو هیوادونو د استخباراتي ادارو د مشرانو په ناسته کې، چې په مسکو کې جوړه شوې وه، له افغانستان څخه د تروریستي ګواښونو په اړه خبرداری ورکړی.

ده وویل: “هغو ګامونو ته په پام چې طالبان د داعش پر ضد اخیستي دي، د افغانستان له چارواکو او استخباراتي ادارو (طالبانو) سره په دې برخه کې او د ناقانونه وسلو او نشه یي توکو د قاچاق پر ضد د اغېزمنې همکارۍ امکانات شته.”

الکساندر بورتنیکوف پرته له دې چې د کوم ځانګړي هیواد نوم واخلي زیاته کړه چې د بهرنیو هیوادونو امنیتي ادارې له نړیوالې ترهګرۍ څخه د نړۍ په بېلابېلو سیمو کې د ناامنۍ د رامنځته کولو لپاره کار اخلي.

د روسیې دغه جګپوړي استخباراتي چارواکي په داسې حال کې په افغانستان کې د ترهګرو پر وړاندې مبارزه، او د نشه یي توکو او وسلو د ناقانونه قاچاق د مخنیوي پر اړتیا ټینګار وکړ چې د دوشنبې په ورځ د روسیې یوه جګپوړی پلاوي افغانستان ته سفرلاړ.

پلاوي د روسیې د امنیت شورا د منشي سرګي شایګو په مشرۍ د طالبانو له چارواکو، په ځانګړې توګه د طالبانو له دفاع وزیر ملا یعقوب مجاهد او د کورنیو چارو وزیر سراج الدین حقاني سره جلا جلا ولیدل.

له دې وړاندې د ډله ییز امنیت تړون د سازمان سرمنشي ایمانقلي تاسماګامبتوف، ویلي و چې په افغانستان کې لا هم یو شمېر مهمې ترهګرې ډلې شته. هغه په افغانستان کې د ترهګرو فعالیتونه د منځنۍ آسیا لپاره جدي ګواښ بللی و. په همدې تړاو، نوموړي زیاته کړه چې له افغانستان سره د تاجکستان د سرحد د تقویت طرحه تصویبېږي.

ځینې کتونکي وايي چې روسیې تل هڅه کړې چې د منځنۍ اسیا هیوادونه د افغانستان له لوري وبیروي څو دا هیوادونه د ګواښونو د مخنیوي لپاره پر روسیې اتکا وکړي او له بلې خوا روسیې ته اډې ورکړي.

تراوسه پورې د مخدرو موادو د قاچاقبرو له یوې – نیمې نښتې پرته، د افغانستان او منځنۍ اسیا د هیوادونو ترمنځ داسي کومه پېښه نه ده شوې چې په هغې کې ترهګرې دلې لاس ولري.