تاند (سې شنبه، د عقرب ۱۵ مه) په امریکا کې د ولسمشرۍ د انتخاباتو د پایلو معلومېدا په کالج الیکترول کې د دوو نوماندانو د رایو نژدې والي او د کلیدي ایالتونو په وضعیت پورې تړلې ده.
نو له دې امله د ټاکنو د پایلو په اړه تر نن شپې مخکې څه ویل ستونزمن کار دی.
دا احتمال شته چې د کلیدي ایالتونو د رایو شمېرل به د ۲۰۲۰ کال په څېر څو ورځې وخت ونیسي. د مثال په توګه، د اوسني ولسمشر جو بایډن بری په ۲۰۲۰ کال کې د ټاکنو له ورځې څلور ورځې وروسته اعلان شو. خو له بلې خوا ډونالډ ټرمپ په ۲۰۱۶ کال کې د رایو د شمېرلو په لومړیو ساعتونو کې په الکټرول کالج کې خپل بری ثابت کړ.
په تیرو کلونو کې د امریکا د ولسمشرۍ د انتخاباتو ورځ په حقیقت کې له ورځې په “اوونۍ” بدله شوې ده ځکه چې هر ایالت د رای اخیستلو او شمېرلو لپاره خپل ځانګړي قوانین لري.
په ۲۰۲۰ کال کې د جورجیا او شمالي کارولینا د پایلې د ټاکنو له ورځې ۱۶ او ۱۰ ورځې وروسته اعلان شوې. سږ کال هم دغه دواړه ایالتونه د کلیدي ایالتونو په ډله کې دي. که د الکټرول کالج رایې د دې دواړو ایالتونو یا کوم بل کلیدي ایالت په پایلو پورې تړلې وي، نو ممکنه ده چې د ټاکنو پایله څو اوونۍ وروسته څرګنده شي.
البته، دا موضوع د کمالا هریس او ډونالډ ټرمپ د رایو په نژدې والي پورې اړه لري. له همدې امله، امکان شته چې د ټاکنو پایله د چهارشنبې په لومړیو ساعتونو کې معلومه شي، یا دا چې پایله ساعتونه، ورځې او ان اوونۍ وروسته هم روښانه نه شي.
هیله ده دا انتخابات د امریکې د ” متحده ایالاتو ” وروستی انتخابات وی.
د امریکائیانو فکری هندسه ګډه وډه سویده ضمناً د دواړو لویو ګوندونو د ستراتژیو او تاکتیکونو څرنګوالی یو د بل سره ډیر کیفی توپیر لری او ممکن دا توپیرونه د امریکی د هیواد په پراخه تجزیه بدل سی.