تاند (سې شنبه، د عقرب ۱۴ مه) د پاکستان تر ټولو په ستر اقتصادي ښار کراچۍ کې، دوه چینایي وګړي په ډزو ټپیان شوي دي.
د پولیسو په وینا، دې چینایي وګړي په یوه خصوصي فابریکه کې کار کاوه او د فابریکې یوه ساتونکي په دوی ډزې کړې دي. ټپیان روغتون ته لېږدول شوي دي.
دا پېښه نن، د نوومبر په پنځمه نېټه، د کراچۍ ښار په “سایټ” مېنه کې شوې ده.
د کراچۍ د جنوبي زون د پولیسو مشر اسد رضا په یوه خبري ناسته کې وویل چې دا چینایي وګړي د “لیبرټي ټکسټایل” په فابریکه کې کار کوي او له ډیفنس سیمې څخه دې ځای ته راغلي وو.
هغه زیاته کړه چې سهار وختي کله چې دوی فابریکې ته ورسېدل، د دوی او یوه ساتونکي ترمنځ شخړه رامنځته شوه چې په پایله کې ساتونکي پرې ډزې وکړې.
رضا وویل چې پولیسو د پېښې په اړه څېړنې پیل کړي دي او د پېښې د علت په اړه معلومات راټولوي.
د سند ایالت د کورنیو چارو وزیر، ضیاالحسن لنجار، هم د چینایي وګړو او ساتونکي ترمنځ د شخړې یادونه وکړه او د تورن ساتونکي د نیولو امر یې وکړ. ه
غه همداراز له شخصي امنیتي شرکتونو څخه وغوښتل چې خپلو ساتونکو ته د ذهني او فزیکي روغتیا په اړه دې مخکې تر مخکې معاینې وکړي.
د رویټرز خبري اژانس د راپور له مخې، د کراچۍ د “لیاقت نیشنل” روغتون ویاند تایید کړې چې ټپیان روغتون ته رسول شوي او د یو تن حالت نازک دی.
دا پېښه وروسته له دې کېږي چې چین په پاکستان کې د خپلو اتباعو د ساتنې لپاره دې هیواد ته دامنیتي ساتونکو د لېږلو خبر ورکړ.
په پاکستان کې پر چینايي وګړو په ځلونو بریدونه شوي دي.