تاند (شنبه، د عقرب ۵ مه) د منځنۍ اسیا تریند خبري اژانس وايي، د ترکمنستان او افغانستان چارواکي د سرحدآباد-هرات د ګازو نللیکې پروژې د جزییاتو په اړه له نژدې کار کوي.
د ټاپي پایپ لاین شرکت اجرايي رییس او د مشرتابه پلاوي مشر، محمد مراد امانوف، په عشق اباد کې د ترکمنستان د تیلو او ګازو په ۲۹مه نړیواله غونډه او نندارتون کې د ترکمنستان د طبیعي ګازو د راتلونکې: نوې صادراتي لارې او د صادراتو وړتیا” په نوم غونډې ته وینا وکړه.
ده ټینګار وکړ چې دا ستراتیژیکه پروژه په دواړو هېوادونو کې د انرژۍ د امنیت له پیاوړتیا او له ترکمنستان څخه افغانستان ته د طبیعي ګازو د صادرولو په زیاتولو کې مرسته کوي.
سربېره پر دې، دا پروژه به د ګازو لپاره نوي فرصتونه برابر کړي او پر زړو او دودیزو لارو د تکیې په کمولو کې به مرسته وکړي. د دې برخې بشپړول به یوازې افغانستان ته نه، بلکې ګاونډیو هېوادونو ته د ګازو رسول چټک کړي، او د منځنۍ اسیا د انرژۍ د بازارونو د اسانه یوځای کېدا لاره هواره کړي.
د تریند پر اساس، د دواړو اړخونو استازي دې پروژې ته په جدي توګه کار کوي او په ګډه د څېړنې او اساسي کارونو د ترسره کولو لپاره لاسونه یو بل ته ورکوي، او ټاکل شوې چې په راتلونکو کلونو کې یې د جوړولو چارې پیل شي. دا به په سیمه کې د انرژۍ د یوې ثابتې او باور وړ زیربنا د بنسټ ایښودلو لپاره یو ستر پرمختګ وي.
یاده دې وي چې د سرحدآباد-هرات برخې د جوړولو چارې، چې د ترکمنستان-افغانستان-پاکستان-هند (ټاپي) ګازو پایپ لاین پروژې په پراخ پلان کې یوه مهمه مرحله ده، د ۲۰۲۴ کال په سپتمبر کې پیل شوې.