تاند ( چهارشنبه د عقرب ۲مه) د خیبر پښتونخوا پولیس وايي، په شمالي وزیرستان او لکي مروت سیمو کې د بریدونو له امله د یو پولیس په ګډون دوه تنه وژل شوي دي.
د شمالي وزیرستان د میرلي پوستې یوه چارواکي د نوم له خپرولو پرته رسنیو ته ویلي، چې د اکتوبر په ۲۳مه غرمه مهال پر موټرسایکل سپرو وسلوالو په میرلي بازار کې یو ځايي وګړی وژلی دی.
د سیمې اوسېدونکي وايي چې د وسلوالو مخونه پټ و او تر برید وروسته وتښتېدل.
په ورته وخت د لکي مروت د پولیسو ویاند شاهد خان وایي، وسلوالو د اکتوبر په ۲۲مه د شپې مهال د هغه ښار په نصرخېلو کې یو پولیس وژلی دی.
دی وايي، پولیس په بنو کې کار کاوه او لکي مروت ته په رخصتۍ تللی وو.
د دواړو بریدونو مسوولیت لا چا نه ده منلې.
د معلوماتو له مخې په تېرو شاوخوا ۲ کلونو کې د خیبر پښتونخوا په جنوبي سیمو کې وسلوال بریدونه زیات شوي،چې پکې ګڼو پولیسو، قومي مشرانو، سیاسیون، دیني عالمانو، فعالانو، حکومتي کارکوونکو او ولسي وګړو ته مرګژوبله اوښتې ده.