تاند (دوشنبه، د میزان ۳۰ مه) د سره صلیب او سره میاشت ټولنو نړیوال فدراسیون وايي چې په افغانستان کې ۳ میلیونه او ۲۰۰ زره تر ۵ کلونو کشر ماشومان او ۸ سوه ۴۰ زره اومیندوارې او شیدې ورکوونکې میندې په خوارځواکۍ اخته دي.
دغه فدراسیون په یوه راپور کې، چې پرون (یکشنبې) یې خپور کړ، ویلي چې د خوارځواکي ناوړه اغېزو یو میلیون او ۷۰۰ زره ماشومان له خظر سره مخامخ کړي دي.
د سره صلیب او سره میاشت ټولنو فدراسیون په ګډ راپور کې په ځانګړي ډول د کندهار او پکتیکا یادونه شوې او ویل شوي چې په کندهار ولایت کې تر یولکو ۴۰ زره ډېر ماشومان او میندې په شدیدې خوارځواکۍ اخته دي.
دوی اندېښنه ښوولې چې د هوا له سړېدو سره ممکن د خوارځواکو ماشومانو او میندو وضعیت لا ستونزمن شي.
په دې راپور کې ټینګار شوی چې د مې او سپټمبر میاشتو ترمنځ د ناروغانو شمېر خورا زیات شوی او وضعیت د اندېښنې وړ حالت ته رسېدلی.
راپور وایي: «تمه ده چې د ژمي په راتګ سره د مړینو وضعیت نور هم خراب شي. له دې امله، د مړینو د مخنیوي لپاره د سختې لوږې د کمولو لپاره د دسمبر او فبروري په میاشتو کې اقدامات لازم دي.»
د سره صلیب نړیوال فدراسیون د دې ناروغۍ زیاتوالی د اوږدې وچکالۍ، طبیعي پېښو، بېځایه کېدو، د ژوند د لګښتونو د ناڅاپي زیاتېدو، غذایي ناامنۍ او پراخې بېکارۍ له امله ګڼي.