تاند (شنبه، د میزان ۲۷ مه) د طالبانو د صنعت او سوداګرۍ وزیر نورالدین عزیزی په مشرۍ، د طالبانو د حکومت ۲۵۰ کسیزه ، د قزاقستان د تولیداتو په نندارتون کې د ګډون او له دغه هیواد سره د تجارتي اړیکو د پیاوړتیا لپاره الماتې ته لاړ.
د طالبانو د صنعت او تجارت وزارت په یوه خبرپاڼه کې ویلي چې په دې پلاوي کې د خصوصي سکتور استازي هم برخه لري او د دې سفر هدف د تجارتي اړیکو کنفرانس، د قزاقستان له چارواکو سره رسمي ناستې او مختلف تجارتي پروګرامونه دي.
په دې پلاوي کې د بهرنیو چارو وزارت او د کانونو او تېلو وزارت استازي او همدارنګه د افغانستان بانک یو استازی شامل دي.
دا سفر د روان کال له پیله د طالبانو او قزاقستان ترمنځ په کابل او الماتې کې د څو تجارتي نندارتونونو په دوام کې کېږي.
قزاقستان له دې وړاندې د دې لپاره چې له کابل سره تجارتي اړیکې پیاوړې کړي، د طالبانو نوم د دې هیواد د تروریستي ډلو له لیست څخه لرې کړی و، چې دا له افغانستان سره د اقتصادي همکاریو د پراخولو په اړه د دې هیواد لېوالتیا ښيي.