تاند (سې شنبه، د میزان ۱۷ مه) د افغانستان برښنا شرکت وایي چې د کابل ولایت په سروبي ولسوالي کې د ۲۲.۷۵ میګاواټه لمریزې برېښنا د تولید چارې پیل شوې.
د لمریزې انرژۍ په دې برېښناکوټ د ترکیې ۷۷ شرکت او د افغانستان سولرستان شرکت ۱۸ میلیون ډالره پانګونه کړې ده.
د طالبانو د حکومت د ريیس الوزرا اقتصادي مرستیال ملاعبدالغني برادر مطبوعاتی دفتر نن (سې شنبې) په یوه خبرپاڼه کې وویل چې د ترکیې سفیر، د افغانستان بانک ريیس، د خصوصی سکټور استازو او د طالبانو د کابینې ځینو غړو د پروژې په پرانستونکو مراسمو کې ګډون وکړ.
د دې پروژې د پرانیستې په مراسمو کې، عبدالغني برادر وویل چې د لمریزې بریښنا د تولید پروژې په تدریجي ډول په وارداتي بریښنا باندې د افغانستان تکیه کمولی شي.
د دې پروژې چارې به په یو کال کې بشپړې شي.