تاند (پنجشنبه، د میران ۱۲ مه) د کډوالۍ نړیوال سازمان (IOM) وايي چې د سپتمبر په میاشت کې ترټولو لوی شمیر افغان اتباع له ایران څخه راستانه شوي چې شمېر یې ۲ لکه ۳۰ زرو ته رسیږي.
د دې ادارې پر اساس، دا د بیرته راستنیدونکو په شمېر کې د پام وړ زیاتوالی ښيي. تر دې وړاندې په مې میاشت کې تر ټولو ډېر کډوال بېرته افغانستان ته راستانه شوي وو خو د سپټمبر په میاشت کې د راستنو شویو شمېر د مې د میاشتې تر راستنېدونکو هم ډېر دی.
د سږ کال په مې میاشت کې یولکو ۹۰ زره افغانان خپل هیواد ته ستانه شوي وو.
د IOM د راپور له مخې، د سپتمبر په میاشت کې د ټولو راستنوشویو کسانو څخه، ۴۳ سلنه ایستل شوي، په داسې حال کې چې ۵۰ سلنه په خپله خوښه بیرته راستانه شوي دي.
دغه راپور، چې د سپتمبر د ۲۲مې او ۲۸مې ترمنځ یې د افغان اتباعو د تګ راتګ ثبت کړی، د افغانستان او ګاونډیو هیوادونو تر منځ د خلکو تګ راتګ یې په تفصیل تشریح کړی دی.
له ایران څخه افغانستان ته د راستانه شویو کسانو شمېر اوسمهال د هغو افغانانو په پرتله ۷۵ سلنه لوړ دی چې له افغانستان څخه وځي.