شهاز شریف: طالبان دې د ترهګرو له منځه وړلو کې چټک ګامونه واخلي

تاند ( شنبه ـ د میزان ۷مه) د پاکستان صدراعظم شهباز شریف وایي، د طالبانو حکومت باید د ترهګرو ګروپونو د له منځه وړلو لپاره چټک ګامونه پورته کړي.
شهباز شریف دا څرګندونې د ملګرو ملتونو په ۷۹مه عمومي اسمبله کې د جمعې په ورځ وکړې.
نوموړي په خپله وینا کې تر ډېره یې د کشمیر په لانجه، په غزه کې روانه جګړه او په افغانستان کې د ترهګرو ډلو پر موجودیت تمرکز وکړ.
شهباز شریف زیاته کړه، چې اوسمهال پاکستان تر ډېره هغه ډلې ګواښي چې د ده په خبره، په افغانستان کې دېره دي.
هغه وویل د طالبانو حکومت باید په افغانستان کې دننه د ټولو ترهګرو ډلو د له منځه وړلو لپاره اغېزمن ګامونه پورته کړي.
د شهاز شریف ټینګار د هغو ترهګرو ډلو په ځپلو وو، چې د نوموړي په وینا ګاونډیو هېوادونو پر وړاندې د پولې هاغاړه د ترهګرۍ مسوول دي.
هغه په خپلو خبرو کې ترهګرې ډلې د داعش یا اسلامي دولت ډلې خراسان څانګه، القاعده او ورسره تړلې ډلې، ټي‌ټي‌پي ( تحریک طالبان پاکستان) فتنه الخوارج، مجید برېګېډ، بلوچ لیبرشن ارمي یادې کړې.
د طالبانو حکومت تر اوسه د دې خبرو پر وړاندې غبرګون نه دی ښودلی، خو تر دې وړاندې یې په ځلونو په افغان خاوره کې د ترهګرو ډلو شتون رد کړی دی.