تاند ( چهارشنبه ـ د سنبلې ۲۸مه) ملګري ملتونه نن د کابل پر وخت ماښام ۶ نیمې بجې افغانستان کې د روان بشري وضعیت په ځانګړي ډول د ښځو او نجونو پر وضعت خبرې کوي.
دې غونډې ته افغانستان لپاره د ملګرو ملتونو د مرستندویه ماموریت یا یوناما مشره روزا اوتونبایووا د افغانستان د روان وضعیت په اړه خپل چمتو کړی راپور وړاندې کوي.
په دغه راپور کې په افغانستان کې د ملګرو ملتونو د مرستندویه ماموریت یا یوناما د فعالیتونو، په دې هېواد کې د سیاسي، بشري وضعیت او د بشري حقونو په برخه کې د پرمختګونو او ستونزو یادونه شوې ده.
د افغانستان په اړه د ملګرو ملتونو د امنیت شورا د نننۍ غونډې په درشل کې پرون سې شنبې د اروپا د پارلمان په یوه فرعي کمېټه کې هم په افغانستان کې د بشري حقونو د روان وضعیت په اړه خبرې وشوې.
ملګري ملتونه؛ سبا د افغان ښځو،نجونو او بشري وضعیت په اړه غونډه جوړوي
په دې غونډه کې د افغانستان د جمهوريت د وخت د ولسي جرګې پخوانۍ غړې شکریه بارکزۍ هم ګډون کړی وو.
هغې په خپله وینا کې له نړیوالې ټولنې غوښتنه وکړه چې د افغانستان روان وضعیت په ځانګړې توګه په دې هېواد کې د بشري حقونو وضعیت ته زیاته پاملرنه وکړي.
د جرمني وېب پاڼې هم پرون سې شنبه د قزاقستان په پلازمېنه استانه کې د قزاقستان، قرغزستان، ازبکستان، ترکمنستان، تاجکستان د ولسمشرانو او د جرمني د صدراعظم اولاف د سرمشریزې یوه ګډه اعلامیه خپره کړه، چې په کې په افغانستان کې بشري حقونو ته د درناوي غوښتنه شوې ده.
په دغه ګډه اعلامیه کې د منځنۍ آسیا د پنځو هېوادونو ولسمشرانو او د جرمني صدراعظم یوځل افغانستان کې د وګړو اساسي حقونو په ځانګړي ډول د نجونو او ښځو حقونو ته د درناوي غوښتنه وکړه.
په اعلامیه کې دغه راز له افغانانو سره د بشري مرستو د دوام پر اړتیا هم ټینګار شوی دی.