تاند ( چهارشنبه ـ د سنبلې ۲۸مه)افغانستان کې د پوليو ضد واکسين د کور په کور کمپاين د منعه کولو د راپورونو له خپرېدو سره سم، د روغتيا نړيوال سازمان په کندهار ولایت د پوليو د يوې نوې پېښې د ثبت خبر ورکړ.
یاد سازمان سې شنبه په یوه راپور کې ویلي،چې د پولیو دا پېښه د اګست په ۱۰مه د کندهار ولایت په سپین بولدک ولسوالۍ کې ثبت شوې ده.
په راپور کې راغلي،چې په دې سره په روان ۲۰۲۴ کال کې د پولیو د مثبتو پېښو شمېر ۳۶ ته پورته، چې ۱۹ یې په افغانستان او ۱۷ یې په پاکستان کې ثبت شوي.
د روغتیا نړیوال سازمان ویلي، چې پهدې اوونۍ کې د پولیو ویروس ۳۵ مثبتې محیطې نمونې ه راپور شوي چې پنځه یې په افغانستان او ۳۰ یې په پاکستان کې دي.
د روغتیا نړیوال سازمان ویلي، دغه پېښې په کندهار، کابل او هلمند ولایتونو کې دي.
دا پهداسې حال کې ده، چې ملګرو ملتونو د دوشنبې په ورځ د وږي په ۲۶مه په یوه راپور کې وویل چې د طالبانو حکومت په افغانستان کې د پوليو ضد واکسين کور په کور کمپاین درولی دی.
خو له هغې یوه ورځ وروسته د طالبانو د عامې روغتیا وزارت په افغانستان کې د پولیو ضد واکسین د کمپاین د درولو او یا منع کولو په اړه راپورونه رد کړل.
د پولیو ضد کور په کور واکسين کمپاين د بنديز په اړه راپورونو په افغانستان کې هم اندېښنې راپارولي دي.