تاند ( سه شنبه ـ د سنبلې ۲۷مه) د ملګرو ملتونو امنیت شورا یوځل بیا د افغان ښځو، نجونو او بشري وضعیت په اړه غونډه جوړوي.
دا ډول غونډې افغان ښځې او د بشري حقونو فعالان د وضعیت د بدلون لپاره مهم بولي.
په افغانستان کې د ملګروملتونو سیاسي استازولۍ یا یوناما په خپله ایکس پاڼه په یوه خبرپاڼه کې ویلي، چې د افغانستان لپاره د ملګروملتونو د سرمنشې ځانګړې استازې او د یوناما مشره روزا اوتانبایوا به د چهارشنبې په ورځ د امنیت شورا غونډې ته د افغانستان د وضعیت په اړه معلومات ورکړي.
د یوناما په خبرپاڼه کې راغلي،چې دغه غونډه به د کابل په وخت د مازیګر په شپږ نیمې بجې پیل شي.
د یاد سازمان د معلوماتو پر اساس په دغه ناسته کې به د دغه سازمان د ښځو د څانګې اجرایوي مشره سیما باهوس او د مدني ټولنې یوه افغانه استازې، چې په اړه جزیات نهدي ورکړل شوي، د افغان ښځو او نجونو په اړه معلومات ورکړي.
د دې ناستې مشري د امنیت شورا نوبتي مشره او د سلوانیا د بهرنیو چارو وزیره تانجافاجون وکړي.
د امنیت شورا د راپور لهمخې د غونډې په پای کې به د افغانستان په اړه سلا مشورې هم وشي.
د افغانستان په اړه د امنیت شورا دا غونډه داسې مهال جوړېږي چې، د طالبانو د امربالمعروف وزارت نوي قانون په دغه هېواد کې د بشري وضعیت په اړه اندېښنې لاپسې زیاتې کړي.
بل لورته ملګرو ملتونو په خپل درې میاشتني راپور کې ویلي، چې د طالبانو د حکومت د مشر ملا هبت الله اخوندازه له لوري د عمومي عفوې له اعلان سره سره د پخواني حکومت د چارواکو او د پخواني حکومت د دفاعي او امنیتي ځواکونو پر وړاندې د بشري حقونو د سرغړونو پېښې دوام لري.
په راپور کې راغلي، چې په افغانستان کې د ملګرو ملتونو مرستندویه پلاوي (یوناما) لږ تر لږه څلور د غیر قانوني وژنو، نهه په خپل سر د توقیف او شپږ د پخواني حکومتي چارواکو او پخوانیو افغان پوځیانو د شکنجې او ناوړه چلند قضيې ثبت کړي دي.
د دغه راپور پر بنسټ، یوناما د «ملي مقاومت جبهې»سره د تړاو په تور د خلکو د خپلسري نیولو یوه قضیه او د غیر قانوني وژنې یوه قضیه هم ثبت کړې ده.
ملګرو ملتونو د افغانستان په اړه په خپل درې میاشتني راپور کې دغه راز زیاته کړې،چې دوی د ۲۰۲۴ کال د مى له ۱۴مې د جولای تر ۳۱مې په افغانستان کې ۲ زره او ۱۲۷ امنیتي پېښې ثبت کړي، چې د تېر زیږدیز کال د همدې مودې په پرتله ۵٣ سلنه زیاتوالی ښیي.
د دغه راپور پر بنسټ، وسله والې نښتې هم په ۲۰۲۳ کال کې له ۳۷ پېښو څخه سږ کال ۸۰ پېښو ته او د ځای پر ځای شویو چاودېدونکو توکو له امله د رامنځته شویو چاودنو شمېر له ۷ څخه ۱۳ پېښو ته لوړ شوی دی.