تاند (چهارشنبه، د سنبلې ۲۸ مه) د امریکا د بهرنیو چارو مرستیال وزیر جان بس اسلام اباد ته د خپل سفر په ترڅ کې د پاکستان له بهرنیو چارو وزیر محمد اسحاق ډار او د پاکستان د پوځ له لوی درستیز عاصم منیر سره وکتل.
په اسلام اباد کې د امریکا سفارت پرون (سې شنبې) په یوه بیان کې وویل، دواړو لورو د اقتصادي او امنیتي مسایلو په برخه کې د دوه اړخیزو همکاریو د پراخولو پر لارو چارو، له ترهګرۍ او افراطیت سره د مبارزې او د سیمې د ثبات او سوکالۍ د پیاوړتیا پر اهمیت خبرې وکړې.
جان بس یوه موده په افغانستان کې د امریکا سفیر و.
تر دې مخکې د امریکا د دفاع وزارت (پنټاګون) د ویاند مرستیالې “سبرینا سنګ” په یوه خبري غونډه کې ویلي و، چې واشنګټن اوس مهال په دغه هېواد کې د ترهګرۍ پر ضد د پاکستان په پوځي عملیاتو کې ښکېل نه دی.
خو دا په داسي حال کې ده چې ځینې راپورونه وايي چې پاکستان د امریکا پوځ ته د بې پېلوټه الوتکو د عملیاتو لپاره څو اډې سپارلي دي.
“جیو نیوز” هم په یوه راپور کې ویلي چې اسحاق ډار له جان بس سره په خبرو کې د پاکستان او امریکا ترمنځ د مثبتو او رغنده تعامل پر اهمیت ټینګار کړی او په اوسنیو اقتصادي او سیمه ییزو امنیتي ننګونو او په ځانګړې توګه د افغانستان له لارې د وسله والو سختدریځو د نفوذ په اړه د نظر تبادله کړې ده.
د دې پاکستاني رسنۍ د معلوماتو له مخې، جان بس د پاکستان د پوځ له لوري درستیز عاصم منير سره د پاکستان او افغانستان ترمنځ په ډیورند کرښه د پوځي همکاريو، جيو پوليټيکي مسايلو او پر امنيتي وضعيت هم خبرې کړې دي.
په پاکستان کې اصلي واک د پوځ د لوی درستیز په لاس کې دی