تاند (شنبه، د سنبلې ۱۰ مه) د ملګروملتونو د سرمنشي ویاند سټیفن دوجاریک پرون په یوه خبري کنفرانس کې وویل چې دا سازمان به د طالبانو په ګډون په افغانستان کې له ټولو ښکېلو خواوو سره تعامل ته دوام ورکړي.
هغه ټینګار وکړ چې ملګري ملتونه په افغانستان کې د بشري حقونو او برابرۍ د تامین لپاره کار کوي.
تر دې مخکې، په افغانستان کې د ملګرو ملتونو مرستندوی ماموریت (یوناما) د طالبانو د امربالمعروف پر نوي قانون نیوکه کړې وه او ویلی یې وو چې دا له نړیوالې ټولنې سره د کابل د اړیکو امکانات زیانمنوي.
د یوناما له دریځ وروسته، د طالبانو د امربالمعروف او نهي عن المنکر وزارت په یوه اعلامیه کې وویل: “د دوامداره منفي پروپاګند له امله، وزارت به له یوناما سره هیڅ ډول همکاری ونه کړي او دا دفتر د اپوزیسیون یوه ډله ګڼي.”