تاند (جمعه، د سنبلې ۹ مه) د سعودي حکومت د هغو بهرنیو اتباعو لپاره چې د حج د مراسمو لپاره دغه هیواد ته ورځي، نوي مقررات وضع کړي دي.
دا نوي مقررات په ځینو برخو کې سخت بلل شوي په تېره بیا د سیاسي فعالیتونو په برخه کې.
د سعودی عکاظ ورځپاڼې د پنجشنبې په ورځ (د اګست په ۳۰ مه) راپور ورکړ چې د دې مقرراتو له مخې، د سعودي د حج او عمرې وزارت د “بهرنیو حاجیانو” د ټولو اړوندو چارو مسوولیت د خپل هیواد د حج او ثبت شوي زیارت په دفترونو پورې تړلی بولي چې حاجیان له هغه لارې سعودي عربستان ته سفر کوي.”
د راپور له مخې، “پر حاجیانو د نافذ شویو قوانینو او مقرراتو د تطبیق مسوولیت د دې دفترونو په غاړه دی.”
سیمه ییزه ورځپاڼه المدینه نوي مقررات “سخت” بللي او لیکلي دي: “د دې مقرراتو له مخې، هر یو دفتر د مراسمو د تنظیم لپاره په بریښنایي سیسټمونو کې د حاجیانو د جزییاتو د ثبتولو مسوولیت هم لري.”
د نویو مقرراتو له مخې، “له حاجیانو سره هر ډول سیاسي عکسونه، کتابونه، بیرغونه، تختې او بروشرونه منع دي او د سعودی د امنیت ګډوډوونکي اقدامات منع دي.”
مقررات “د رسمي تبادلې له دفترونو څخه بهر هر ډول سوداګریزې معاملې، حوالې، دلالي یا د بهرنیو اسعارو تبادله” هم منع کوي.