تاند (یکشنبه، د سنبلې ۴ مه) په افغانستان کې د ملګروملتو مرستندوی ماموریت، یوناما د طالبانو د امربالمعروف او نهي عن المنکر پر نوي قانون اندېښنه څرګنده کړه او ویې ویل چې دا قانون د خلکو پر فردي چلند پراخ محدودیتونه لګوي او محتسبانو ته یې د اجرا کولو واک ورکوي.
یوناما په یوه خبرپاڼه کې، چې نن (یکشنبې) یې خپره کړې، د افغانستان لپاره د ملګروملتو د مرستندوی ماموریت د مشري روزوا اوتنبایوا له قوله ویلي:
«دا د افغانستان د راتلونکي لپاره یو ځورونکی لیدلوری دی، چیرې چې محتسبین واک لري چې د پراخو او کله ناکله د ناڅرګندو سرغړونو د لست پر بنسټ هر څوک وګواښي او توقیف یې کړي.»
نوموړې همداراز ویلي، «دا د افغان ښځو او نجونو پر حقونو باندې د نه زغملو وړ محدودیتونه پراخوي، ان له کوره بهر د ښځو غږ په ښکاره ډول اخلاقي سرغړونه ګڼي.»
د طالبانو د امر باالمعروف دا نوی قانون چې د اګسټ په ۲۱ یې اعلان کړی ټول څلور فصلونه او ۳۵ مادې لري.
د یاد قانون په بېلابېلو مادو کې ټول نارینه په ټاکلي وخت په جومات کې په جماعت لمانځه ادا کولو مکلف شوي او د نارینه د ږیرې پر خرېولو، د لنډو جامو، نېکټایي کارولو او د دې قانون په ټکو د “غربیانو او کفارو” په شان د وېښتانو پر جوړولو هم بندیز لګېدلی دی.
د دې قانون په ۲۴ ماده کې محتسبیو ته واک ورکړل شوی، چې د ځینو مواردو سرغړونکي له یو ساعت څخه تر ۲۴ ساعتونو پورې او ځني هم تر درې ورځو پورې په محابسو کې حبس کړي، خو مشخصه شوې نهده، چې د کومو مواردو سرغړونوکو ته څومره حبس.