تاند (پنجشنبه، د سنبلې لومړۍ) د بریتانیا د اکسفورډ پوهنتون د فزیک د څانګې ساینسپوهانو د برېښنا د تولید لپاره خورا کوچنی پنل جوړ کړی چې په هر ځای کې کارول کېدای شي.
د سي این این تلویزیون د راپور له مخې، دا ډېر نازک او د لمر جذبوونکی پنل قاتېدای هم شي چې پر هر جسم کېښودل شي.
د لمریزې انرژۍ د اوسنیو غټو شیشو یا پنلونو دوه برابره انرژي تولیدولی شي.
دا پینل به د لمریزو پنلونو د فارمونو اړتیا کمه کړي چې د مځکې لویې برخې نیسي او یا د خلکو د کورونو ټول بامونه پوښي.
دا ټکنالوژي په یو مهم وخت کې اختراع شوې ځکه چې اقلیمي بدلون په چټکۍ سره مځکه تودوي او نړۍ دې ته اړ کوي چې د پاکې انرژۍ په لور حرکت ګړندی کړي.
دا پنل د پیرووسکیټ په نوم موادو څخه جوړ شوی چې د سیلیکون لرونکو پینلونو په پرتله د لمر ډېره انرژي جذبوي.