تاند (شنبه، د اسد ۲۷ مه) د بلوچستان په چاغي سیمه کې د پنځو تنو افغانانو مړي په داسي حال کې موندل شوي چې د بریښنا په پایو پوري تړل شوي وو.
د بلوچستان ایالت پولیسو نن وویل چې وژل شوي کسان د افغانستان د هلمند ولایت د مرکز لښکرګاه اوسیدونکي دي.
پولیسو تر اوسه د قربانیانو د هویت په اړه نور جزییات نه دي خپاره کړي.
ځایي پولیس وایي، دغه پنځه کسان، چې اوس یې مړي د عدلي طب د معاینې لپاره د کوټې یوه روغتون ته وړل شوي، اصلاً په بل ځای کې وژل شوي او وروسته چاغي ته راوړل شوي دي.
تر دې دمه کومې ډلې د دې وژنو مسوولیت نه دی منلی.
خو داسي اوازې شته چې دا کسان د افغانستان د تېر جمهوري حکومت امنیتي ځواکونه وو.
ګومان کېږي چې دا هغه پنځه تنه وي چې جېش العدل ډلې د روانې میاشتې په پیل کې د هغو د نیولو خبر ورکړ.
دې ډلې ویلي و چې د افغانستان د پخواني حکومت ۵ غړي یې په دې تور نیولي چې د ایران له سپاه پاسداران سره تار لري او د دوی د یوه مشر په وژلو کې لاس لري.
خو جېش العدل تراوسه پورې په دې اړه څه نه دي ویلي.