د ازبکستان صدراعظم عبداله عارفاوف د یوه پلاوي په مشرۍ کابل نن (شنبې) ته راغی.
دا د طالبانو په درې کلنه واکمنۍ کې افغانستان ته د ازبکستان د صدراعظم او د نړۍ د یوه جګپوړي مشر لومړنی رسمي سفر دی.
د طالبانو د صنعت او سوداګرۍ وزارت پر خپله ایکسپاڼه لیکلي، چې عبداله عارفاوف به د افغانستان او ازبکستان ترمنځ د تجارتي اتصال په دوه اړخیزه غونډه کې برخه واخلي او بیا به د ازبکستان د تولیداتو او محصلاتو یو نندارتون وویني.
دا نندارتون نن د ازبکستان د پانګونې، صنعت او تجارت وزیر لزیز قدرتوف او د طالبانو د صنعت او سوداګرۍ وزیر نورالدین عزیزي پرانیست.
ازبکستان جدي هڅې پیل کړي چې د ترانس افغان په نوم د ریللارې په وسیله ځان له جنوبي اسیا سره وصل کړي.
پرون د ازبکستان د ګرځندوی وزیر امېد شادیف د طالبانو د اطلاعاتو او کلتور وزیر قدرت الله جمال سره په کتنه کې له افغانستان سره د ګرځندوی د صنعت په برخه کې د همکارۍ ډاډ ورکړ.
تر اوسه پورې د ازبکستان په ګډون د نړۍ یوه هېواد هم د طالبانو سرپرست حکومت په رسمیت نه دی پېژندلی، خو ازبکستان یو له هغو هیوادونو څخه دی چې د طالبانو له حکومت سره د سوداګري اړیکو په انګېزه نژدې تعامل لري.