تاند (چهارشنبه، د اسد ۱۷ مه) د افغانستان بانک نن (چهارشنبې) وویل چې په هرات، خوست، هلمند، غزني او کندهار ولایتونو کې یې د بې جوازه صرافیو فعالیتونه ځنډولي دي.
په دې کې د پیسو هغه بدلوونکي شامل دي چې د سوداګرۍ جوازونه یې نه دي ترلاسه کړي او د پیسو بدلونکی چې خپل جوازونه یې نه دي تمدید کړي.
د افغانستان بانک ویاند حسیب الله نوري وایی، دا اداره غواړي چې د شرکتونو له لارې مالی خدمتونه وړاندې کړي.
صرافان وایي چې دوی د افغانستان بانک د پولي سیاست ملاتړ کوي خو دوی ته باید د فعالیت جواز ورکړل شي او د جواز په ویشلو کې باید اسانتیاوې برابرې شي.
دوی همداراز وايي: “۶۵ لکه افغانۍ د جواز غواړي، دوه لکه افغانۍ هم لګښت لري، ۶۷ لکه افغانۍ، ۶۶ لکه افغانۍ، يا ۶۰۰ لکه، بايد موجودې ولرې، له کومه شي.”
د هرات د صرافانو د ټولنې له غلام محمد سهرابي هم وايي، د صرافۍ د جواز ترلاسه کولو لپاره شپږ ميليونه افغانۍ ته اړتيا ده دغه شان ورسره د جواز د ترلاسه کولو لپاره د ٥٠٠ زره افغانيو بانکي سټېټمېنت هم ضروري ده.
د تېرې اوونۍ د سې شنبې په ورځ د جولاى په ٣٠مه د هرات ګڼ شمېر صرافان د طالبانو د حکومت د والي د دفتر مخې ته راټول شوي وو او ویل یې د طالبانو د حکومت له لوري د صرافۍ د جواز د ترلاسه کولو لپاره ټاکل شوې پيسې ډېرې دي او د برابرولو توان يې نه لري.