تاند (سې شنبه، د اسد ۲ مه) د پاکستان ډان ورځپاڼې نن ادعا وکړه چې د پاکستان حکومت له اعتراض کوونکو سره تر خبرواترو وروسته سوداګرو او کارګرو ته اجازه ورکړه چې په شناختي کارد او تذکرو د چمن – سپین بولدک ترمنځ تګ راتګ وکړي خو د طالبانو پوله ساتو بې پاسپورټ او وېزې افغانستان ته د هغوی د ننوتو مخه ونیوله. طالبانو په رسمي ډول په دې اړه څه نه دي ویلي.
دا په داسي حال کې ده چې پرون د پاکستان د پوځ ویندوی وویل، افغانستان شپږ ګاونډیان لري او له پاکستان پرته له ټولو سره تګ راتګ په پاسپورت او وېزې کوي نو هیڅ جواز نه شته چې څوک د افغانستان او پاکستان ترمنځ هم د بې ویزې تګ راتګ غوښتنه وکړي.
دغه موافقه د پاکستان د حکومت له خوا له څو مياشتو لاريونونو او د يو شمېر اعتراض کوونکو له نيولو وروسته شوې ده.
د ډان د راپور له مخې، له شاوخوا نهو میاشتو وروسته د پاکستان حکومت د چمن لاره بېرته پرانېستله او سمدلاسه یې ګڼ شمېر مسافر چې د دې اقدام په انتظار وو افغانستان ته ننوتل. د راپور له مخې، د لارې له پرانیستلو څو ساعته وروسته طالبانو د هغو کسانو مخه ونیوله چې پاسپورټ او ویزې یې نه درلودې.
د ډان ورځپاڼې د راپور له مخې طالبان په چمن کې له مظاهره چیانو سره د پاکستان د حکومت له موافقې راضي نه دي او د دغې ډلې چارواکو ویلي چې په تړون کې ټاکل شوي شرطونه یو اړخیز وو او له دغې ډلې سره خبرې نه دي شوي.
دې ورځپاڼې نن د اسد په دويمه ليکلي، چې د طالبانو سرحدي ساتونکو هغو کسانو ته چې غوښتل يې د زوکړې په سند افغانستان ته ننوځي، له پولې هاخوا اجازه نه ورکوي.
طالبانو د پاکستاني ورځپاڼې د ادعا په اړه تراوسه څه نه دي ویلي.
وایی غله ته وایه غلا وکړه د کور خاوند ته وایه بیدار اوسه. دغه تور پنجابي هم خپل غلام طالب ته وویل اوس ته اجازه مه ورکوه 😡