تاند (سې شنبه، د سرطان ۱۹ مه) د پاکستان حکومت اعلان کړی، چې استخباراتي ادارې آی اېس آی ته یې د امنیتي ګواښونو د مهارولو په هدف د ټلیفوني مکالمو د ثبتولو اجازه ورکړې ده.
پاکستاني رسنیو ویلي، چې آی اېس آی ته دا اجازه د دغه هېواد د مرکزي حکومت کابینې ورکړې ده، خو خلکو په دې اړه توند غبرګون ښودلی او ویلي چې مخکې هم پاکستاني پوځ او استخباراتو په خپله خوښه ورته چارې ترسره کولې.
د دوی په وینا، د دغه کار له رسمي اعلان سره به د خلکو د خصوصي حریم نقض لا زیات او پاکستان نور هم د استبداد قرباني شي.
پاکستان په وروستیو کې بیا- بیا د دوی خلاف د تروریستي خطرونو د زیاتیدو ادعا لري او ملامتي یې تر ډېره په دې پلمه پر افغانستان اچوي، چې ګواکې تروریستي ډلې له افغان خاورې د پاکستان خلاف بریدونه سمبالوي.
افغان څارونکي بیا باور لري، چې دغه هېواد په دې پلمو او استخباراتي ډرامو له یوه پلوه پر افغانانو د خپلو تروریستي بدنامیو ملامتي غواړي واچوي او له بله پلوه له نړیوالو متحدینو څخه یې په دې نوم بیا پراخې مرستې ترلاسه کړي چې ګواکې د ترهګرۍ قرباني دی.