تاند (سې شنبه، د سرطان ۱۹ مه) د ترکیې د سوداګرۍ وزیر عمر بولات وايي چې که ۲۵ زره افغان بزګران له ترکیې ووځي نو دلته به د څارویو پالنه پای ته ورسیږي.
هغه په ترکیه کې د کارګرانو په تېره بیا شپنو کموالي ته په اشارې اعتراف وکړ: «د کارګرانو کمښت حتی د بهرنیو کارګرانو په مرسته نه شي حل کیدای.»
د اردوغان د کابینې دغه غړي په ترکیه کې د بهرنیو کارګرانو د بیړنۍ اړتیا په اړه وویل چې په وروستیو میاشتو کې د افغان کډوالو په اړه د ترکیې د سیاستونو په وړاندې د دغه هیواد د اتباعو او مخالفو ګوندونو غبرګونونه زیات شوي دي.
د ترکیې د سوداګرۍ وزیر وویل: «د کاري ځواک کمښت یوه جدي ستونزه ده. دا تشه په بهرنیو کارګرانو نه شي ډکیدی. د بېلګې په توګه، که نن ۲۵۰۰۰ افغان بزګران ووځي، نو کرنه او مالداري به په هېواد کې پاتې نه شي.»
د بولات دا خبرې د ترکيې په ټولنيزو شبکو کې له بېلابېلو غبرګونونو سره مخامخ شوې دي.
د دې مرکې له خپریدو او د غبرګونونو له زیاتیدو څو ساعته وروسته، د ترکیې د سوداګرۍ وزارت په یوه بیان کې څرګنده کړه چې د بولات څرګندونې په ټولنیزو رسنیو کې “تحریف شوي” دي.
خو په دې اعلامیه کې یو ځل بیا ټینګار شوی چې د دغه هېواد په ختیځو سیمو کې د کرنې په برخه کې د کارګرو کمښت شته او دا تشه یوازې په افغان مهاجرینو ډکېدای شي. په دې اعلامیه کې ویل شوي چې د کارګرانو کمښت د بازار پر وضعیت اغېز کوي.
دې ته ورته په ځلونو ځینو ایرانی چارواکو منلې چې که افغان کارګر نه وي د دوی کرنیزې مځکې به شاړې شي او د ودانیو د جوړولو چارې به یې په ټپه ودریږي.
په دواړو هیوادونو کې افغانان په ټیټه اجوره او له هر ډول بیمې او بل ډول امتیازه پرته کار کوي.