تاند (دوشنبه، د سرطان ۱۸ مه) د عامې روغتیا وزارت وايي چې نن د افغانستان په ۳۲ ولایتونو کې د ماشومانو د ګوزڼ یا پولیو پر ضد عمومي واکسیناسیون پیل شو.
د دغه وزارت ویندوی شرافت زمان پر خپله ایکسپاڼه یا پخواني ټویټر لیکلي، د واکسین دا کمپاین به ۴ ورځې دوام وکړي.
د ده په وینا په څلورو ورځو کې به ۸ میلیونه تر ۵ کلونو کشر ماشومان د هیواد په ۳۲ ولایتونو کې د پولیو په وړاندې واکسین شي.
په همدې حال کې د روغتیا نړیوال سازمان د دې کمپاین د پیلیدو په مناسبت په یوه خبرپاڼه کې له افغانانو په ځانکړي ډول له میندو او پلرونو غوښتي چې خپل ماشومان واکسین کړي او افغانستان د پولیو له ویروسو پاک کړي.
افغانستان او پاکستان په نړۍ کې هغه دوه هیوادونه دي چې لا هم د پولیو ویروس پکې له منځه نه دي تللي.
روانه اوونۍ د کندهار ولایت په شاولیکوټ او ارغستان ولسوالیو کې د پولیو دوې مثبتې پېښې ثبت شوې.
له دې سره سږ کال په کندهار کې د پولیو مثبتې پېښې څلورو ته ورسېدې چې درې یې تایید شوي او یوه پېښه لا تایید شوې نه ده، خو په ماشوم کې د ګوزڼ نښې لیدل شوي دي.
د پولیو ضد کمپاین لومړی پړاو د روان کال په ثور میاشت کې او دوهم پړاو یې بیا په جوزا میاشت کې ترسره شو.