د م.م. د کډوالو لوی کمیشنر په پېښور کې له افغان کډوالو سره وکتل

تاند (یکشنبه، د سرطان ۱۷ مه) د ملګروملتونو د کډوالو لوی کمیشنر فیلیپو ګرانډي د یکشنبې په ورځ په پېښور کې له افغان کډوالو او پناه غوښتونکو سره په داسې حال کې وکتل چې درې ورځنی سفر به یې د افغان کډوالو پر ستونزو، خپل هیواد ته د افغان کډوالو د بېرته ستنولو په اړه د اسلام اباد پر پلان او په نورو هېوادونو کې د افغانانو د بیا مېشتېدو په اړه وي.

په پاکستان کې د کډوالو د لویې کمیشنرۍ ویندوی قیصر افریدي ډان ډاټ کام ته وویل چې د ملګروملتونو د کډوالو لوی کمېشنر ګراندي د افغان کډوالو له پلاوي سره وکتل او په پاکستان کې یې د دوی د ستونزو په اړه ورته معلومات ورکړل.

د UNHCR مشر افغان کډوالو ته ډاډ ورکړ چې د کډوالو د ټولو ستونزو په اړه به له پاکستاني چارواکو سره خبرې وکړي.

د افریدي په وینا، په افغان پلاوي کې راجستر شوي کډوال او هغه کسان شامل وو چې د 2021 په اګست کې د طالبانو له واک څخه وروسته پاکستان ته تللي وو.

د ملګروملتو د کډوالو لوی کمیشنر په پېښور کې د ایالتونو او سرحدي سیمو (SAFRON) له وزیر امیر مقام سره هم ولیدل.

د افغان کډوالو چارې هم له سیفران وزارت سره تړلي دي.

په یوه رسمي بیان کې د سیفران وزیر ګراندي ته وویل: “پاکستان له 40 کلونو راهیسې له سختو اقتصادي ستونزو سره سره د افغان کډوالو کوربه توب کوي.”

وروسته له هغه چې دغه هیواد د تیر کال په اکتوبر کې د “غیرقانوني بهرنیانو” د بیرته ستنیدو پلان اعلان کړ، دا پاکستان ته د UNHCR د مشر لومړی سفر دی.

په افغانستان کې د طالب واکمنانو په زوره د افغان کډوالو د ایستلو په اړه د پاکستان پر پرېکړې په غوسه غبرګون ښودلی دی.

پاکستان د تېر کال په سپټمبر کې اعلان وکړ چې ټول بې اسناده افغان کډوال له خپلې خاورې باسي.

پاکستان اوس ویلي چې د (ACC) کارت لرونکي کډوال هم باسي.

د کډوالو د لویې کمیشنرۍ یا UNHCR د معلوماتو له مخې، د هغو افغانانو شمېر چې د (ACC) کارت لري، تر 800,000 څخه ډیر د دی.

عباس خان ډان ډاټ کام ته وویل چې د ACC لرونکو پریکړه به د افغانستان او UNHCR په ګډون د ټولو شریکانو سره په مشوره وشي.

پاکستان په ۲۰۱۷ کال کې بې اسنادو افغانانو ته د ACC کارتونه ورکړي وو.

د UNHCR د اټکل له مخې 1.3 ملیونه راجستر شوي افغانان په پاکستان کې اوسي.

پاکستاني چارواکي وايي چې د ۲۰۲۱ کال د اګست په میاشت کې د طالبانو له واک ته رسیدو وروسته شاوخوا ۷۰۰۰۰۰ افغانان پاکستان ته کډوال شوي دي. ډیری یې غواړي چې درېیم هیواد ته ولاړ شي.