تاند ( ۲ شنبه، د سرطان ۱۱ مه) د طالبانو د کورنیو چارو وزیر سراج الدین حقاني او د استخباراتو لوی رئیس عبدالحق وثیق د دوی د رژیم د رئیس الوزرا سیاسي مرستیال مولوي کبیر سره لیدلي او متحده عربي اماراتو ته د خپل وروستي سفر معلومات یې شریک کړي.
د طالبانو یوه ویاند حمد الله فطرت د حقاني له قوله ویلي، چې هېوادونه د دوی رژیم سره تعامل ته لېواله شوي دي.
سرچینې په دې اړه نور جزیات نه دي ورکړي، خو ویلي چې مولوي کبیر هم د دوی رژیم سره د هېوادونو د لېوالتیا زیاتیدو خبره کړې ده.
طالب چارواکي او بهرني متحدان یې په وروستیو کې بیا- بیا دغه رژیم سره د بهرني تعامل د زیاتیدو د لېوالتیا خبر ورکوي، خو تر اوسه یوه هېواد هم طالب رژیم په رسمیت نه دی پېژندلی.