تاند (شنبه، د سرطان ۹ مه) د طالبانو د رژیم عمومي ویاند ذبیح الله مجاهد، د ده په مشرۍ د دوحې درېیمې ناستې ته د طالب پلاوي له ورتلو مخکې په کابل کې یوې خبري غونډې ته ویلي، چې د دوحې په ناسته کې د دغه پلاوي ګډون له هېڅ لوري سره د دښمنۍ په مانا نه بلکې له نړۍ سره د ښه تفاهم او ستونزو د حل په موخه دی.
مجاهد زیاته کړه، چې په دې غونډه کې د طالبانو د پلاوي تمرکز به تر ډېره بریده پر دې وي، چې د افغانستان د ستونزو د حل په اړه د غونډې له ګډونوالو سره د افغانانو واضح پیغام شریک کړي.
هغه په ځانګړي ډول له نشه يي توکو سره د مبارزې، اقتصادي ستونزو او د بانکي سیسټم یادونه وکړه.
نوموړي د یوې پوښتنې په ځواب کې وویل چې د دوحې په ناسته کې به د نړۍ له یو شمېر هېوادونو سره د طالبانو د ستونزو او تعامل د رامنځته کېدو په تړاو خبرې وشي او په وینا یې د افغانستان کورني موضوعات د دغه ناستې په اجنډا کې ځای نه لري.
نوموړي همدارنګه څرګنده کړه، چې اوسمهال د دوی رژیم سره د ګڼو هېوادنو سياسي اړیکې رسمي بڼه لري او هیله هيله من دی، چې پلاوی به یې د دوحې په راتلونکې ناسته کې نورو هېوادونو ته هم قناعت ورکړي، چې له طالب امارت سره لا تعامل ولري او په دې تړاو د هغوی اندېښنو ته ځواب وویل شي.
مجاهد هیله څرګنده کړه، چې د دغه ډول ناستو جوړېدل او په هغه کې د افغانستان په استازیتوب د طالبانو د اسلامي امارت د پلاوي ګډون به د نړۍ له لوري په افغانستان کې د حاکم رژیم د رسمیت پېژندلو ته لاره پرانیزي.
د یادونې وړ ده، چې د دوحې راتلونکې ناسته به سبا ( د جون۳۰مه) پیل شي، چې د طالبانو د رژیم له لوري به پکې د دوی د ویاند ذبیح الله مجاهد په مشرۍ د کورنیو چارو، بهرنیو چارو، صنعت او سوداګرۍ وزارتونو، قطر کې د طالبانو د سیاسي دفتر مشر او د افغانستان بانګ له استازو څخه جوړ ۶ کسیز پلاوی ګډون وکړي.