تاند (چهارشنبه، د جوزا ۳۱ مه) راپورونه وايي، د ټي ټي پي یا د پاکستاني طالبانو تحريک قوماندان عبدالمنان، چې په حکيم الله هم مشهور و، د یکشنبې په ورځ (جون ۱۶) د افغانستان په کونړ ولايت کې د نامعلومو کسانو له خوا وژل شوی دی.
هغه د ټي ټي پي له ملاکنډ څانګې سره تعلق درلود.
د قوماندان عبدالمنان وژنه د تحریک طالبان پاکستان لپاره یوه لویه ضربه او د اسلام اباد لپاره یوه لویه لاسته راوړنه ګڼل کیږي.
د پاکستاني رسنیو د راپورونو له مخې، منان په پاکستان کې دننه په ګڼو بریدونو تورن و.
پاکستاني رسنیو ادعا کړې چې منان په ډیرو هدفي وژنو کې لاس درلود او د سړک د غاړې په بمي چاودنو او د چاودیدونکو توکو (IEDs) په کارولو تورن و.
د پاکستان رسنیو پر اساس، ممکن د استخباراتو پر بنسټ عملیات (IBOs) قطعې د منان په وژلو کې لاس لرلی وي، دا قطعه په منظم ډول په بلوچستان او خیبر پښتونخوا کې دا ډول عملیات کوي.
منان په ۲۰۲۳ کال کې د پاکستاني طالبانو د مشر نور ولي محسود له خوا د ټي ټي پي له بیا تنظیمېدو وروسته د دې تحریک د ملاکنډ شورا غړی وټاکل شو. ده د ټي ټي پي ملاکنډ د مشر عظمت الله محسود (عظمت لالا) ولي ملاکنډ د شخصي یاور یا مرستیال په توګه هم کار کړی دی.
منان د کونړ په سرکاڼو کې د ټي ټي پي په یوه مدرسه کې د ملا په توګه هم دنده ترسره کوله. هغه د ټي ټي پي له څو مهمو قوماندانانو لکه طاهر عرف وقار، عمر عرف اسماعیل او نورو سره هم کار کړی دی.
منان په ۱۹۸۵ کال کې د باجوړ ضلعې په سالارزو کې زېږېدلی او د مازاخېلو له قبیلې سره تعلق لري. هغه په لومړي ځل د ۲۰۰۷ کال په ډسمبر کې له TTP سره یوځای شو او له ۲۰۰۸ څخه تر ۲۰۱۰ کال پورې یې په عنایت کلی، لوی سم، ډمه ډوله او سپرۍ کې د امنیتي ځواکونو پر ضد په لویو بریدونو کې په فعاله توګه برخه واخیسته.
نوموړی په ۲۰۱۴ کال کې د افغانستان د ملکي حکومت له خوا په ننګرهار ولایت کې ونیول شو او د تحریک طالبان پاکستان له نورو قومندانانو لکه شاهد عمر او MFM سره یوځای بندي و.
د ۲۰۲۱ په اګست کې د کابل له سقوط او د طالبانو له بیا واک ته رسیدو سره سم خوشي شو.