تاند (چهارشنبه، د جوزا ۳۰مه) د ترانسپورت او هوايي چلند وزارت وايي چې په هرو ۲۴ ساعتونو کې د افغانستان له فضا څخه له ۱۰۰ تر ۱۲۰ الوتکې تېرېږي.
د دې وزارت ویندوی امام الدین احمدي نن (چهارشنبې) وویل چې افغانستان له هرې الوتکې څخه ۷۰۰ ډالره حق العبور ترلاسه کوي.
دا په داسې حال کې ده چې د تېر حکومت په وروستیو کلونو کې هره ورځ شاوخوا ۴۰۰ الوتکې د افغانستان له فضا تېرېدې.
تېر کال د افغانستان له فضا څخه ۲۵ زره الوتکې تېرې شوې وې چې له درکه یې افغانستان ۸ میلیارده افغانۍ عاید ترلاسه کړ.
دا په داسي حال کې ده چې د جمهوري حکومت په مهال د افغانستان له فضا په کال کې تر ۹۵ زره الوتکې تیریدې.
د طالبانو له واک ته رسیدو وروسته تر ډېره وخته د افغانستان له فضا بهرنۍ الوتکې نه تیریدې ځکه چې د افغانستان د رادار سیستم له کاره لوېدلی و. خو اوس په تدریج عادي حالت ته راګرځي. همداراز افغانستان ته د بهرنیو هوايي شرکتونو الوتنې ودرېدې خو په وروستیو دوو کلونو کې څو هوايي شرکتونو کابل ته الوتنې بیا پیل کړې.
امام الدین احمدي د افغانستان ملي راډیو او ټلوېزیون ته وویل چې د هېواد له پنځو نړیوالو هوايي ډګرونو څخه هره ورځ بهر ته الوتنې کېږي.
دغه طالب چارواکی وايي، د ننګرهار هوايي ډګر چې په تېر حکومت کې د پوځي هوايي ډګر په توګه کارول کېده، نړیوالو الوتنو ته چمتو دی.
طالبان وايي، په افغانستان کې د پنځو نړیوالو هوايي ډګرونو په ګډون ۲۷ فعال هوايي ډګرونه شته.
داسې نه وي چه کوم یوه آلوتکه پر افغانستان کوم یو د مرضو او یا نورو زهریاتو مواد وشیندي، آیا دا الوتکې معلوم دي چه کوم ملک پورې تړون لري؟!