تاند (جمعه، د جوزا ۲۵ مه) د المپیک نړیوالې کمېټې اعلان وکړ چې افغانستان به د پاریس المپیک لوبو ته د دریو ښځو او دریو نارینه وو ټیم ولیږي.
دې کمېټې د پنجشنبې په ورځ وویل، ښځې به د منډې او بایسکل ځغاستې په سیالیو کې ګډون وکړي او نارینه همکاران به یې په اتلتیک، لامبو او جوډو کې برخه واخلي.
د المپیک کمېټې ویلي چې د داسي لوبډلې لېږل چې جنسیتي مساوات پکې په پام کې نیول شوی وي، هم د طالبانو تر واک لاندې افغانستان ته او هم درستې نړۍ ته پیغام لري چې ښځې او نارینه دواړه د سپورت او لوبو حق او امکانات لري.
د المپیک د نړیوالې کمېټې ویندوی مارک اډمز وویل: “دا د المپیک د نړیوالې کمېټې د هغو کارونو پایله ده چې له تیرو څو کلونو راهیسي روان دي، دا کمېټه د افغانستان د المپیک له ملي کمیټې سره په ګډه کار کوي ترڅو ډاډ ترلاسه کړي چې ښځینه ورزشکاران په لوبو کې برخه اخیستلی شي.”
د المپیک نړیوالې کمېټې په عین حال کې وویل چې “د طالبانو د حکومت هیڅ استازی ته به د المپیک اعتبارلیک ورنه کړل شي”.
د اډمز په وینا، «د المپیک نړیوالې کمېټې تایید کړه چې په جلاوطنۍ کې د ريیس او سکرترجنرال په ګډون د افغانستان د المپیک ملي کمیټه د افغان ټیم د چمتووالي او ګډون لپاره د یوازینۍ لوري په توګه مني.»
د المپیک نړیوالې کمېټې تر دې مخکې په ۱۹۹۹ کال کې د افغانستان د المپیک ملي کمېټه ځنډولې وه او دغه هېواد د ۲۰۰۰ کال د سیډني له لوبو منع شوی و.