تاند (یکشنبه، د جوزا ۲۰ مه) د کرکټ په نړیوال شل اوره جام سیالیو کې د شنبې په ورځ استرالیا د انګلیستان لوبډلې ته په ۳۶ منډو ماته ورکړه.
استرالیايي لوبغاړو د انګلیستان ټیم ته ۲۰۲ منډې هدف وټاکه چې دا په روان شل اوره جام کې تر دې دمه تر ټولو لوړ هدف و.
استرالیا چې ۷ لوبغاړي یې وسوځېدل په شلو اورونو کې دا هدف وټاکه.
انګلیسي لوبغاړو د استرالیا په وړاندې خورا ښه لوبه پیل کړه خو ویې نه کړای شول چې په ۲۰ اورونو کې هدف ته ځان ورسوي.
د انګلیستان لوبډلې د ۶ لوبغاړو له بایللو او ۲۰ اورونو وروسته ټولټال ۱۶۵ منډې وکړای شوې.
د دې ورځې بله سیالي د نیدرلنډ یا هالنډ او جنوبي افریقا ترمنځ وه چې جنوبي افریقا په ګرانه وګټلی شوه.
د نیدرلنډ لوبډلې د ۹ لوبغاړو له سوځېدو وروسته په ۲۰ اورونو کې یوازې ۱۰۹ منډې وکړای شوې.
د جنوبي افریقا لوبډلې هدف ته ځان په اتلسم اور او ۵ توپ ورساوه او په دې توګه یې دا سیالي په ۴ ویکټونو او ۷ اضافي توپونو وګټله.
ټاکل شوې ده چې د یکشنبې په ورځ په سي ګروپ کې، چې افغانستان هم پکې شامل دی، د ویسټ انډیز او یوګنډا لوبډلې مخامخ شي. افغانستان له یوګڼدا څخه په ۱۲۴ منډو خپله لومړنۍ سیالي ګټلې ده.
همداراز په اې ګروپ کې به خورا په زړه پورې سیالي د هند او پاکستان ترمنځ د افغانستان د ماښام په ۷ بجې پیل شي.
عمان او سکاټلنډ هم د یکشنبې په ورځ د افغانستان د شپې په نهه نیمې بجې مخامخ کېږي.