تاند (سې شنبه، د جوزا ۱۵ مه) د ملګروملتونو امنیت شورا اعلان وکړ چې د افغانستان په اړه غونډه جوړوي.
د امنیت شورا د میاشتني راپور له مخې، په دې غونډه کې به په افغانستان کې د ملګرو ملتونو د مرستندوی پلاوي مشره روزا اوتونبایوا او د افغان مدني ټولنې غړي ویناوې وکړي.
ټاکل شوې ده چې د ملګروملتونو د سرمنشي د بشري چارو مرستیال او د بیړنیو مرستو همغږوونکی مارتین ګریفیتس هم افغانستان ته د مرستو رسولو په اړه راپور وړاندې کړي.
نوموړي ته په دې برخه کې د امنیت شورا د ۲۶۱۵ پرېکړه لیک له مخې ماموریت سپارل شوی دی.
په داسې حال کې چې د غونډې کره نېټه لا نه ده ټاکل شوې، خو په اجنډا کې به د القاعدې او داعش پر ضد د بندیزونو د مسودې په اړه د رایې اخیستل شامل وي.
دا غونډه په داسې حال کې کېږي چې ملګري ملتونه د افغانستان په اړه د دوحې د درېیم کنفرانس لپاره چمتووالی نیسي چې ټاکل شوې د جون تر پایه د بېلابېلو هېوادونو د ځانګړو استازو په ګډون دایره شي.