تاند ( ۳ شنبه، د جوزا ۱۵ مه) په کابل کې د طالبانو د واکمن رژیم ویاند ذبیح الله مجاهد وایي، چې د ملګرو ملتونو په کوربه توب د دوحې د درېیمې ترسره کېدونکې ناستې اجنډا د دوی رژیم سره شریکه شوې ده.
د مجاهد په وینا، دوی به د اجنډا تر ارزونې وروسته په دغه غونډه کې خپل دریځ او شرطونه مطرح کړي.
نوموړی دغه راز د دوحې غونډه کې د ګډون لپاره د طالبانو رژیم د شرطونو په اړه خپاره شوي رپوټونه بې بنسټه ګڼي.
ټاکل شوې د دوحې درېیمه غونډه تر راتلونکې څه کم یوې میاشتې د ملګروملتونو په کوربتوب د افغانستان لپاره د هېوادونو د ځانګړو استازو له حضور سره په دوحه کې جوړه شي.
طالبانو د دوحې په دویمه غونډه کې ګډون رد کړی و، چې له امله یې سختو نیوکو سره مخ شوي وو.
د دوحې د را روانې غونډې په درشل کې د طالبانو پر رژیم له بېلابېلو لوریو ټینګار دا شوی، چې دغې غونډې ته خپل پلاوی واستوي.
تر اوسه څرګنده نه ده، چې طالبان او د غونډې ګډونوال به د غونډې د اجنډا په تړاو کومو پر کومو موضوعاتو هوکړې ته ورسیږي.