تاند (یکشنبه، د جوزا ۱۳ مه) نا تایید شوي خبرونه ښيي، چې پاکستان ډرون الوتکو د پکتیکا ولایت په ګومل ولسوالۍ کې بریدونه کړي.
د سیمه ییزو سرچینو د معلوماتو له مخې، په دغو بریدونو کې تر ۸ پورې کسان وژل شوي دي.
ځینو پاکستاني سرچینو ادعا کړې، چې وژل شوي کسان د تحریک طالبان پاکستان یا ټي ټي پي اړوند وسله وال دي.
د پاکستان او طالبانو چارواکو رسماً د دغو بریدونو په اړه تر اوسه څه نه دي ویلي.
په وروستیو کې پاکستان خپلې دې ادعا ته شدت ورکړی، چې ګواکې د افغانستان له خاورې د دوی خلاف د ټي ټي پي او نورو ډلو د بریدونو لپاره کار اخیستل زیات شوي.
طالب رژیم دا ادعاوې بې بنسټه ګڼلي او پاکستان یې د داسې تورونو پر ځای د خپل امنیت ساتلو ته بللی.
د طالبانو له بیا واک ته رسېدو سره پاکستان څو ځله ډیورنډ کرښې ته څېرمه د افغانستان پر بېلابېلو سیمو ورته بریدونه کړي او د وژل شویو هویت یې د ټي ټي پي اړوند ګڼلی.
د طالبانو منتقدان بیا دوی د ټولو ادعاوو خلاف یې، د افغانستان په حریم ساتلو کې په ناکامۍ او د پاکستان پر وړاندې په خاموشۍ او نمایشي مخالفتونو تورن کړي.