تاند (شنبه، د جوزا ۱۲ مه) په هرات کې د طالبانو د والي مرستیال، مهاجر فراهي نن (شنبې) وویل چې په دې ولایت کې یې د داعش یوه مهمه ډله نیولې ده.

ښاغلي فراهي ادعا وکړه چې نیول شوې ډلې د سږ کال د ثور په میاشت کې د هرات د ګذرې ولسوالۍ په محمدي ښارګوټي کې د امام زمان پر جومات په برید کې لاس درلود.

ښاغلی فراهي نیول شوي کسان فتنه اچوونکي بلي دي. طالبان عموماً د داعش غړي فتنه اچوونکي او یا خوارچ بولي.

مهاجر فراهي نن (شنبې د جوزا په ١٢مه) پر خپله ایکسپاڼه لیکلي چې له دغو کسانو څخه يو ځانمرګي واسکټ، يو موټر او څو وسلې ترلاسه شوي دي.

د ثور په ۱۰ مه شپه وسله والو کسانو د هرات د ګذرې ولسوالۍ په محمدي ښارګوټي کې د امام زمان په جومات کې پر لمونځ کوونکو برید وکړ.

د طالبانو د کورنیو چارو وزارت هغه مهال اعلان وکړ چې په دغه برید کې د یوې ښځې او یوه ماشوم په ګډون شپږ عبادت کوونکي وژل شوي دي. له دې پېښې یوه ورځ وروسته داعش په خپل ټیلیګرام چاینل کې د دې پېښې پړه پر غاړه واخیسته.

د طالبانو د کورنیو چارو وزارت ویاند عبدالمتین قانع هماغه مهال ویلي و چې «یوه نامعلوم وسله وال د کلاشینکوف په وسیله د جومات پر لمونځ کوونکو ډزې کړې دي».

طالبانو تر دې مخکې هم د داعش ګڼ شمېر غړي نیولي او ویلي چې اکثره د نورو هیوادونو غړي دي.