تاند (یکشنبه، د جوزا ۱۳ مه) د اروپا د فوټبال د اتلانو لیګ په پایلوبه کې د هسپانیا ريال ماډریډ د جرمني د ډورټمومونډ بوروسیا لوبډلې ته ۲ـ۰ ماتې ورکړه.
دا سیالي چې د شنبې په ماښام د جون په لومړۍ نېټه د لندن په وېمبلي لوبغالي کې وشوه، په لومړۍ نیمايي کې دواړه لوبډلې د ګول په وهلو بریالۍ نشوې.
د لوبې د دوهمې نیمايي تر اویایمې دقیقې پورې هم د دواړو طرفونو بریدونه روان و، خو دواړو لوبډلو ته د ګول وهلو چانس په لاس نه ورتو.
د لوبې ۷۴یمه دقیقه وه چې د ریال ماډریډ لوبډلې ډني کارواهال ګول وواهه. د لومړي ګول له وهلو لا څلور دقیقې نه وې تېرې چې ریال ماډریډ ته دا ځل وینیکېس جونیر ګول وواهه.
دا پینځلسم ځل دی چې ریال ماډریډ د اروپا د اتلانو لیګ پایلوبه ګټي.
د ویلو ده چې په دې لیګ کې د اروپايي هېوادونو د فوټبال ۳۲ لوبډلو په ۸ ګروپونو کې سره سیالۍ وکړې.